Mopasiugda’g balik ang GerryPens Promotions ni kanhi two-time world champion Gerry Penalosa og boxing event nga giulohan og “Bangon Cebu” sa dakbayan sa Bogo karong Enero 24, 2022.
Ang GerryPens Promotions nakigtambayayong sa inilang businessman/sportsman sa Sugbo nga si Lorenzo “Chao” Sy alang sa pagpahigayon ning maong promosyon.
Sa main event, ang undefeated fighter nga si Christian Pitt Laurente sa Manila mopakita na usab sa iyang kalantip pinaagi sa pagpakigsakbang ni Vicente Casidi sa Dumaguete City sulod sa 10 ka hugna.
Mosaka sa ring ang 22-anyos nga Laurente dala ang limpiyo nga baraha, 8-0, diin lima niini gipang-knockout.
Sa iyang uwahing duha ka mga away, si Laurente impresibong mipaundang nila ni Ernie Sanchez niadtong Oktubre, 2021 sa Bawing Gym sa General Santos City ug ingon man ni Kim Lindog sa Tabunok Sports Complex, Talisay City niadtong Hulyo 16 sa susamang tuig.
Si Casido, 26, naggunit og 6-3-1, 2 knockouts nga rekord.
Magsangka sa undercard sila si Jhon Marr Tihuk sa Manila batok Jay-R Tilunan sa Cagayan de Oro City, Khenneth Llover sa Manila batok Jimpaul Dignos sa Cebu City, ug Noli James Masuilun sa Manila batok Rui Dorong sa Cebu City.
Magsilbeng lamas sa promosyon mao ang amateur bouts ug ingon man ang bingo social.
Ang promosyon gisuportahan ni Senador Manny Pacquiao.