Mahibalik na usab sa dakbayan sa Bogo ang sinukliay sa kumo ibabaw sa ring sa dihang ang GerryPens Promotions ni kanhi two-time world champion Gerry Peñalosa, sa makausa pa, mopresentar og usa na non-title fight nga giulohan og "Bangon Cebu" karong Enero 24, 2022 adlawng Lunes.
Inabagan ni businessman/sportsman Lorenzo "Chao" Sy, ang undefeated fighter nga si Christian Pitt Laurente sa Manila mopakita na usab sa iyang kalantip pinaagi sa pagpakigsakbang ni Vicente Casidi sa Dumaguete City sulod sa 10 ka hugna.
Mosaka sa ring ang 22-anyos nga Laurente dala ang limpiyo nga baraha, 8-0, diin lima niini gipang-knockout.
Sa iyang uwahing duha ka away, si Laurente impresibong mipaundang nila ni Ernie Sanchez niadtong Oktubre 2021 didto sa Bawing Gym sa General Santos City ug ingon man ni Kim Lindog sa Tabunok Sports Complex, Talisay City nianang Hulyo 16 sa susamang tuig.
Si Casido, 26-anyos, bitbit usab ang 6-3-1 nga baraha nga may duha ka knockout. Ang pagbangon gikan sa tulo ka sunodsunod nga kapildihan maoy misyon ni Casido batok ni Laurente ning awaya.
Sa iyang katapusang away, ang lumad nga taga Dumaguete City apan ania na sa Sugbo nagbasehan, nakapakita og saktong labok apan napildi kini pinaagi sa majority decision batok ni Rodex Piala sa niaging tuig diha sa Consonsa Compound sa Mandaue City.
Gawas sa Laurente-Casidi main event fight, ang panagsangka nila ni Jhon Marr Tihuk sa Manila batok Jay-R Tilunan sa Cagayan de Oro City sa scheduled eight-round fight.
Mosuway usab si Khenneth Llover sa Manila sa katakos ni Jimpaul Dignos sa Cebu City sa 6-round 115 lbs. bout.
Si Noli James Masuilun (Manila) makigbatok usab ni Rui Dorong (Cebu City) sa four-round match.
Gawas sa mga professional fights, modugang usab sa kaikag ang amateur bouts ug ingon man adunay bingo social nga ipahigayon.
Ang promotion gisuportahan usab ni Senador Manny Pacquiao. (JBM)