Dili ra matangtangan og gold medal sa 19th Asian Games ang Gilas Pilipinas taliwala sa pagkahagbong sa bayani niining si naturalized player Justin Brownlee sa drug test.
Mao kini ang gipaneguro ni Philippine Olympic Committee (POC) president Bambol Tolentino.
Nagkanayon si Tolentino nga base sa Anti-Doping Rule (ADR), kinahanglang duha o mas daghan pa sa mga mga miyembro sa usa ka team ang masuta’ng positibo sa banned substances aron mapahamtangan og bug-at nga silot ang team nga maglakip sa diskuwalipikasyon.
Sa kaso sa Gilas, bugtong si Brownlee lang ang nasuta’ng positibo sa Carboxy-THC, matod sa Lausanne-based International Testing Agency (ITA).
Ang Carboxy-THC adunay kalambigitan sa marijuana.
“Based from the ADR rule, if it’s a team event you need more than 2 athletes na mag-positive. So since sa final list si Brownlee lang ang positive... e positive nga rin ‘yung isang Jordan e. Tabla lang din tayo. Atin pa rin ang gold,” pasabot ni Tolentino nga napatik sa www.abs-cbnnews.com.
Adunay katahap si Tolentino nga posibleng adunay kalambigitan ang mga tambal nga gipangtumar ni Brownlee dihang nagpaalim kini sa iyang pagkaangol sa wala pa ang 2023 FIBA World Cup.
“Remember, Brownlee was injured before kaya ‘di sila nakalaro nung FIBA World Cup. When you’re injured, lahat naman tayong tao, you are having a medication. ‘Yun lang, hindi ko alam kung may nainom siyang konting bawal don or what,” pasabot ni Brownlee.
Ang Gilas milupig sa Jordan, 70-60, sa men’s basketball finals niadtong Oktubre 6, 2023 sa Hangzhou, China, aron hatagan ang Pilipinas sa labing una niining basketball gold gikan niadtong 1961.
Ning maong duwa, nagpakatap si Brownlee og 20 puntos ug 10 ka rebounds.
Nagkanayon si Tolentino nga gitagalan sila hangtod karong Oktubre 19, 2023 aron modesisyon kon mosaksi ba sila sa pag-abli sa sample B nga maoy maghatag og pinal nga desisyon.
Kon positibo gihapon si Brownlee sa sample B, posibleng mapahamtangan kini og suspensyon.