Nakapasar ang Gilas Pilipinas sa bugtong nilang tune-up game alang sa 19th Asian Games human nila gipangbuntog ang South Korean club Changwon LG Sakers, 86-81, ning Biyernes, Septiyembre 22, 2023, sa Philsports Arena sa Pasig City.
Gikan sa 70-70 nga panagtabla, ang Gilas ningmugna og 12-5 run aron pagposte og 82-75 nga labaw sa tunga-tungang bahin sa 4th quarter.
Sa hinapos nga bahin, ang Koreans ningpahak sa labaw sa Gilas, 84-80, ug ning higayuna, ang mga Pinoy ningsandig na og maayo ni naturalized player Justin Brownlee aron pagselyo sa kadaugan.
Ning duwaa, ang bag-ong mga sakop sa Gilas nga sila si CJ Perez, Chris Ross, Kevin Alas, Marcio Lassiter ug Arvin Tolentino ang gigamit sa Gilas ug dili ang grupo ni Calvin Abueva, nga pulos kuwestiyunableng makaduwa sa Asian Games.
Ang ubang mga sakop sa Gilas mao sila si JuneMar Fajardo, Japeth Aguilar, Scottie, Ange Kouame, Chris Newsome ug Calvin Oftana.
Ang LG Sakers ningkombati nga adunay American reinforcements nga sila si Dante Cunningham ug Reggie Perry, lakip na si Egyptian Assem Marei.
Ang Gilas nakatakdang molarga ning Sabado, Septiyembre 23, 2023 paingon sa Hangzhou, China atol sa pagsugod sa Asian Games. Sugdan sa Gilas ang ilang kampanya sa matag upat ka mga tuig nga kompetisyon karong Septiyembre 26, 2023 batok sa Bahrain.