Padayon ang pagpahanas sa Gilas Pilipinas sa team chemistry alang sa ilang pag-asdang ngadto sa Hangzhou, China para sa 2023 Asian Games.
Ang team nga gipangulohan sa bag-ong national team head coach nga si Tim Cone nagpraktis sa Inspire Academy didto sa Laguna.
Matod ni Cone, ang winningest coach sa Philippine basketball, nga ang ilang main concern karon mao ang unang duwa sa Gilas batok Bahrain sa Septiyembre 26.
“Bahrain is someone we really should consider, they’re a sleeper team right there,” batbat ni Cone human sa ilang morning practice sa Inspire Sports Academy sa Calamba, Laguna.
“They’ve got a Spanish coach, they swept through the qualifiers, they beat Kazakhstan by 30 points, they beat Indonesia by 25, so they’re a team to reckon with right now. We think they’re the sleeper,” dugang niini.
Ang sleeper team nagpasabot nga adunay abilidad ang maong bando, apan wala kini kaayo makita tungod sa “various flaws” sa ilang team composition.
Si Cone ug ang Gilas coaches misuway na pagkuha sa mga inpormasyon sa Bahrain team nga maoy makadugang sa pagpangandam sa national team alang sa opening day sa men’s basketball competition.
“We don’t want to get bushwhacked in that first game, so we have to make sure we’re ready to go,” sigon ni Cone.
Ang Pilipinas anaa sa Group C kauban sa Jordan, Bahrain ug Thailand.
Duwaon sa Pilipinas ang Bahrain sa Septiyembre 26, Thailand sa 28 ug Jordan sa petsa 30.
Ang kanhi import sa Philippine Basketball Association nga si Wayne Chism maoy pambato sa Bahrain, si kanhi UCLA Tyler Lamb nagduwa sa Thailand, ug ang current TNT import Rondae Hollis-Jefferson ang star player sa Jordan.
Ang top team sa ilang group modiretso og abante ngadto sa quarterfinals, samtang ang No. 2 ug No. 3 placers moduwa og crossover knockout games sa ilang counterpart sa pikas nga group.
Ang quarterfinals duwaon sa Oktubre 3, samtang ang semis sa Oktubre 4, dayon ang medal match sa Oktubre 6.
Si Cone mao ang uwahing coach nga midala sa Pilipinas sa podium finish sa Asian Games niadtong 1998. / RSC