Nakabangon gikan sa duha ka sunodsunod nga kastigo ang Gilas Pilipinas Women ug namungot kini sa Chinese-Taipei, 92-81, ning Miyerkules, Hunyo 28, 2023 sa FIBA Women’s Asia Cup sa Sydney Olympic Park Sports Centre sa Australia.
Ang Gilas Women, nga nalubong og taga liog sa nag-una nilang duha ka mga tahas batok sa host Australia ug Japan, nagpabilin sa Division A tungod sa ilang kadaugan batok sa Chinese-Taipei.
Kontrolado sa Gilas Women ang hapit kinatibuk-ang kombati ug adunay higayon nga niabot og 14 puntos ang lang labaw.
Ang Gilas Women gipangulohan ni Fil-American guard Vanessa de Jesus pinaagi sa iyang 25 puntos, niamot og 18 puntos si Alfril Bernardino samtang nidugang og 16 puntos ug 15 ka rebounds si Jack Animam.
Mao kini ang labing unang higayon nga nakatilaw og daog ang Gilas Women sa group stage ning maong kompetisyon gikan niadtong 2015.