Nimugna og 40 puntos si Jayson Tatum samtang nidugang og 30 puntos si Jaylen Brown aron pangulohan ang Boston Celtics sa pagmasaker sa overall leader Milwaukee Bucks, 140-99, ning Biyernes, Marso 31, 2023 (PH time) sa National Basketball Association (NBA).
Niini, niamag ang purohan sa Celtics nga mailog nila ang No.1 overall spot gikan sa Bucks inig human sa regular season.
Nagpabilin man tuod sa ibabaw ang Bucks dala ang 55-22 nga rekord apan hinayhinay na nga ningsikit ang Celtics nga nagdala og 53-24 nga rekord.
Ning maong season, nalupig sa Celtics ang Bucks, 2-1, sa tulo nila ka mga engkuwentro ug kon magtabla ang ilang rekord inig human sa regular season, hayan makuha sa Celtics ang No. 1 overall spot.
Mahinungdanon ang pagsakmit sa No. 1 overall gumikan kay maghatag kini og homecourt advantage sa kinatibuk-ang playoffs.
“It does matter,” matod ni Brown kabahin sa inilugay sa No.1 overall seed. “We want to finish out the season strong and see what happens.”
Ang dakong kadaugan seguradong makahatag sa Celtics og dugang pagsalig kon ikaharong nila pagbalik ang Bucks sa playoffs sa ikaduhang sunodsunod nga season.
Nagkayamukat ang Bucks sa kinatibuk-ang duwa. Gituohan nga resulta kini sa kahago gumikan usa ra ka adlaw ang gintang gikan sa ilang pagsulong sa Indiana Pacers diin nitali sila og 149-136 nga kadaugan sa pagpangulo ni Jrue Holiday, kinsa nipupo og 51 puntos ning kombatiha.
Apan batok sa Celtics, si Holiday igo ra nakamugna og unom ka mga puntos.
“We know what the deal is,” matod ni Giannis Antetokounmpo, kinsa maoy nangulo sa Bucks pinaagi sa iyang 24 puntos.
“If you’re not focused and you don’t play hard, they are going to kick our (butt). Simple as that. There is no level of concern. It’s a fact. If we play the same way, we’ll have the same outcome. We’ve got to have some pride.”
Paghuman sa tulo ka quarters, ang Celtics nakamugna na og 114-74 nga labaw.
Gumikan niini, kadaghanan sa starters sa duha ka mga kampo wala na gipaduwa aron makapreserba og enerhiya hilabi na kay nagkaduol na ang post season. (AP)