MOBALIK og saka ibabaw sa ring si Evander “The Real Deal” Holyfield batok ni Kevin McBride kinsa maoy nagpa-retiro kaniadto ni Mike Tyson karong Hunyo 6, 2021.
Kini ubos sa promosyon sa Triller Fight Club (TFC) kinsa nidugang og mga respetado ug dekalidad nga boksidor para sa kalingawan.
Si Holyfield ug McBride magsumbagay sulod sa unom ka rounds didto sa Florida, USA diin moaway usab silang Teófimo López and George Kambosos Jr..para sa title fight.
Bugtong si Holyfield ang nag-inusarang boksidor sa kalibotan nga adunay upat ka titulo sa world heavyweight ug siya nabantog sa ilang away kaniadto ni Tyson diin naputol ang iyang dunggan.
Si Holyfield, 58 anyos, adunay professional boxing record nga 44-10-3 makigsinukliay sa kumo ni McBride 47 anyos ug adunay 35-10-1 para sa usa ka exhibition match apan i-apply ang tanang rules sa professional boxing.
Naila sa kalibotan sa boksing si McBride dihang iyang gipalukapa si Tyson niadtong Hunyo 2005 sa Washington DC human sa 6th round.
Ang pormal nga pag-anunsyo sa TFC ipahibawo sa mosunod nga mga adlaw.
“Our continued reinvention of boxing as four-quadrant entertainment now adds one of the biggest names in the history of boxing, Evander Holyfield, against one of the best opponents, Kevin McBride,” matod ni Kavanaugh sa TFC.
Nisulod sa professional boxing si Holyfield niadtong 1986 ug nidaog siya batok sa inilog nga si Dwight Muhammad Qawi pinaagi sa split decision aron angkunon ang WBA junior heavyweight title ug nagsunodsunod na ang pagsikat ni Holyfield.
Gipilde usab niya si George Foreman, Larry Homes apan napilde siya sa 12th round decision batok ni Reddick Bowe niadtong Nobyembre 13, 1992 ug iyang nabaslan sa rematch niadtong 1993 apan sa ilang trilogy, siya napukan ni Bowe.
Niabot usab og trilogy ang away ni Holyfield ug Tyson nga maoy nakapahatag og aligre sa boksing human sa ilang away ni Bowe. Si Holyfield maoy ikaduhang legend nga nigawas sa ilang pagretiro aron moaway og balik human ni Tyson sa niaging tuig. (PAC)