“Idol 3” boxing public workout sa Tabuelan

MOPAHIGAYON og public workout sugod karong alas 5:00 sa hapon ang nag-unang mga protagonista sa “Idol 3” boxing promotion sa Tabuelan Astrodome sa lungsod sa Tabuelan, Cebu.

Sa public workout, ang ALA fighters nga sila si Kevin “KJ” Cataraja, Virgil Vitor ug Christian Bacolod mopakita og mga lihok sa ilang training alang sa tagsatagsa nila ka umaabot nga away.

Sa main event sa promosyon, si Cataraja makig-away kang Indonesian Frengky Rohi. Si Vitor makigbatok kang Gerpaul Valero samtang si Bacolod makigsangka kang Mervin Lulu.

Ang promosyon, nga gitambayayungan pagpahigayon sa ALA Promotions, ABS-CBN ug Island Paint, ipahigayon karong Hunyo 16 sa samang venue nga pahigayunan sa public workout.

Magbinukbokay sab sila si Jimmy Paypa sa Cebu City batok Jun Ryan Quimbo sa Carmen, Cebu. (ESL)