MIPAKATAP og 27 puntos si Kyrie Irving, lakip niini ang iyang fadeaway jumper sa free throw line ug ang 31-footer nga tres aron ituboy ang Boston Celtics ngadto sa 117-108 nga kadaugan batok sa league-leading Toronto Raptors kagahapon sa National Basketball Association (NBA).
Sa iyang pagbalik gikan sa usa ka duwa nga pagpalta tungod sa bun-og sa iyang tuo nga paa, si Irving mipugnit og 10 puntos fourth quarter nga gilamasan og unom sa iyang 18 ka assists aron hulmahon ang 17-4 nga rally nga maoy nagtuldok sa kadaugan.
Maayo usab nga nakatampo sa opensa si Al Horford nga may 24 puntos ug Jayson Tatum nga mipakli og 16 nga may 10 ka rebounds alang sa unang duwa sa Boston og balik diha sa ilang korte human sa tulo ka sunodsunod nga kapildihan sa ilang pagpanulong.
Perming naglabaw unta ang Raptors sa first half ug gani mao pa kini ang naghupot sa bintaha, 104-100 sa katapusang 4:22 segundos sa dihang mipabuto og tres si Kawhi Leonard.
Apan nabakwi sa Boston ang labaw sa three-point play ug sa tres ni Tatum alang sa 106-104. Gikan niadto, wala na makasustiner pa ang Raptors sa ilang kombati ug gipahimuslan sa Celtics ang ilang sagunson nga mga turnovers aron pagsiguro sa kadaugan.
Si Leonard mitali og 33 puntos samtang 22 usab ang natampo ni Serge Ibaka alang sa Raptors nga nahagsa sa 33-13 nga baraha alang sa ikaduhang puwesto, sunod sa 32-12 nga record sa Milwaukee Bucks.
Ang Boston milandig sa ikalima nga may 26-18 nga baraha.
Sa laing panagsangka, gipahagsa sa Brooklyn Nets ang Houston Rockets bisan pa man sa 58 puntos nga ni James Harden.
Si Spence Dinwiiddie nagbangis sa fourth quarter diin iyang gipakli ang 25 sa iyang 33 puntos aron ituboy ang Nets ngadto sa 145-142 nga kadaugan.
Niadtong Lunes, si Harden naka 57 puntos sa dihang ilang gipukan ang Memphis.
Si Dinwiddie mao usab ang naghatod sa duwa ngadto sa overtime human kini nakapabuhagay og tulo ka tres sulod sa 30 segundos sa regulation period ug sa extra period, siya usab ang nakapadaog sa Nets sa nahabiling 28 segundos.
Gipaluhod usab sa San Antonio Spurs ang Dallas Mavericks, 105-101. Naglabaw ang Mavs og 19 puntos gihinayhinay kini og kitkit sa Spurs ug ang tres ni Davis Bertans maoy naghingpit sa ilang kadaugan.
Midaog ang Golden State Warriors batok sa New Orleans Pelicans, 147-140. JBM