Nihangyo ang basketball superstar Lebron James sa mga taga Cleveland nga tabangan ang mga pulis sa ilang imbestigasyon sa pagkamatay sa igsuon sa iyang suod nga amigo sa Ohio, Estados Unidos.
Si Ericka Weems, ang igsoon sa dugay nga nga amigo ni James nga si Brandon Weems, nakit-an na nga patay niadtong Lunes (Martes sa Pilipinas) nga adunay samad pinusilan sa iyang ulo.
“AKRON OHIO!!” suwat ni James sa iyang Twitter account kagahapon. “My brother’s sister was murdered this past weekend in her home! My brother family need answers to why and by whom.”
Gipasabot ni James nga dili angayang paundayunan kining maong binuhatan ug kinahanglang masilutan ang nagbuhat niini.
“My city I need y’all to go to work and find out who did this awful, shameful, disgusting thing to such a caring, loving angel! #Justice4EricaWeems,” dugang sa four-time NBA champion.
Si James ug Brandon dugay na nga amigo ug nahimo silang teammates sa St. Vincent-St Mary High School basketball team.
Ang mga detective sa Cleveland miawhag sa mga taga Ohio nga kon aduna silay impormasyon kabahin niini motawag lang sa mga hotline numbers.
Adunay $5,000 nga reward nga ihatag ang Summint Country Crimestoppers sa tawo nga makahatag og impormasyon.
Si James lumad nga taga Akron, Ohio ug na-draft siya sa Cleveland isip number one overall pick niadtong tuig 2003 sa National Basketball Association (NBA).
Nahimong back-to-back nga kampiyon si James sa tuig 2012 ug 2013 dihang nagduwa pa siya sa Miami Heat.
Sa iyang pagbalik sa Cleveland nahatagan ni James ang Cavaliers sa ilang labing unang kampiyonto niadtong tuig 2016 diin ilang gilupig ang defending champions nga Golden State Warriors.
Milayat na pud og laing team si James niadtong 2018 ug miapil sa Los Angeles Lakers, nga bag-uhay lang mikampiyon sa NBA “bubble” season sa Orlando, Florida.
Sa iyang 17 ka tuig sa liga, ang 35-anyos nga si James nakabulsa na og daghang awards sama sa upat ka NBA tittles, upat ka Finals MVP, upat ka regular season MVP, 16-time NBA All-Star ug Rookie of the Year. / RSC