GIPAABOT nga adunay mangatumba karong hapon, Hulyo 3, 2021, pagsinukliay og mga kinumo nila ni Penitente “Thunder” Apolinar sa Omega Boxing Stable ug Jess Rey Waminal sa Bukidnon sa “Kumbati 10” boxing series nga ipahigayon sa IPI Compound, dakbayan sa Mandaue.
Ilugan ni Apolinar ug Waminal ang Oriental Pacific Boxing Federation (OPBF) silver featherweight title sa main event fight sa pito ka paresan nga kombati nga sugdan sa alas 4:00 sa hapon.
Sa weigh-in kagahapon, Hulyo 2, 2021, si Apolinario, kinsa adunay 14-1, 8KOs nga baraha, mitimbang og 125.8 libras samtang si Waminal (14-3-1, 8KOs), ang WBA Asia interim bantamweight champion, mipatong sa 125.5 libras.
Sa co-main event, si Mark Vicelles (13-0-1) mosuway sa katakos sa wala pay pildi nga si Jerven Mama (12-0-1, 7KOs) sa SanMan Boxing Gym sa 10-round showdown. Sa undercard, si Tomjune Mangubat makigbatok kang Ernie Sanche, Regie Suganob batok MJ Bo, Benny Canete makigbinukbokay ni Jimpol Dignos, Rodel Suganob mosakbang ni Mark Jequinto samtang mag-abot usab sila si Franco Serafica ug Jeffrey Stella. (JBM)