NAGPAKATAP og 40 puntos si Jaylen Brown aron agakon ang Boston Celtics
batok sa hosts Los Angeles Lakers, 121-113, kagahapon sa National Basketball Association (NBA).
Ang Celtics naglabaw og 27 puntos sa sayong bahin sa 4th quarter ug gipapahuway na ni coach Brad Stevens ang iyang starters.
Apan sa wala damha, paspas nga ninggukod ang defending champions Lakers ug kalit lang nahimong kulbahinam ang kombati.
Sa pagpangulo nila ni Talen Horton-Tucker ug Ben McLemore, ang Lakers ningmugna og dakong rally nga nagpahak sa labaw sa Celtics ngadto sa lima na lang mga puntos, 115-110, sa nahabiling 1:18 minutos.
Gipukaw ni Brown ang pagkahinanok sa opensa sa Celtics pinaagi sa iyang upat ka sunodsunod nga puntos nga naghatag kanila og 119-112 nga labaw sa nahabiling 32 ka mga segundos.
Ang Lakers, nga padayong ningkombati nga wala ang ilang duha ka mga lider nga sila si LeBron James ug Anthony Davis, wala na nakapanghudlat gikan niini hangtod na sa katapusang gutlo.
“The Celtics-Lakers matchup is a matchup that kids dream about, so regardless of who’s on the oor, I’m excited to play,” asoy ni Brown. “Having that energy with those Lakers fans back in the arena, it feels good to get a win.”
Ningdugang og 15 puntos matag usa sila si Payton Pritchard ug Marcus Smart samtang niamot og 14 puntos matag usa sila si Jayson Tatum
ug Tristan Thompson.
Ang Lakers gipangulohan ni Horton-Tucker pinaagi sa iyang 19 puntos, nihatag og 18 puntos si Marc Gasol samtang nitampo og 17 puntos si McLemore.
“Those guys came out and competed their tails off,” batbat ni Lakers coach Frank Vogel kabahin sa nahabilin niyang mga magduduwa. “I wanted them to be able to get the ‘W,’ but that was awesome how they played.”
Ang Lakers ningkombati nga wala sab ang ilang bagong pambatong sentro nga
si Andre Drummond ug Markie Morris, kinsa parehong adunay angol. (AP)