Mipakatap og 19 puntos si Giovanni Laguyo, 11 puntos usab ang natampo ni Jair Edrei Igna, aron hingpit nga haruson sa Asian Orthopedics-Batch 2014 ang elimination round, 8-0, sa nagpadayon nga 25th Season Sacred Heart Ateneo Alumni Basketball Athletic Association (SHAABAA) Division C sa Dominggo sa Magis Eagles Arena, dakbayan sa Mandaue.
Katapusang gibiktima sa Orthopedics sa elims ang SABR Solutions Batch 2018, 79-62, sa duwa nga kasiyam gyud mag-usab usab ang matag og sakmit sa labaw ug kaduha magtabla.
Human mabiyai sa unang duha ka kwarter, 33-31, ang Orthopedic nakakita og gamayng bangag nga ilang gikulit ngadto sa dako aron maoy ilang malutsan paingon sa kadaugan.
Ubos sa pag-ayuda nila ni Lucky Ecarma ug Popoy Navarro kinsa pulos naka-double figure, ang Batch 2014 miimbargo sa labaw, 57-48, sa pagkapupos sa third quarter.
Gikan niini wala na gyud mobuhi pa sa manubela ang Orthopedics nga nagsubay sa dalan sa kadaugan.
Si Ecarma mipuga og 11 puntos ug 13 ka rebounds samtang si Navarro mibuhi usab og 10 puntos ug 10 ka rebounds.
Sa kapildihan, ang Batch 2018 nahagsa sa 4-3 nga baraha alang sa ikatulo nga puwesto, apan kinahanglan kining modaog sa sunod ug katapusan nilang misyon sa elimination round aron paglikay sa komplikasyon kon kinsa makaangkon sa ikaupat ug katapusang lingkuran alang sa semifinals series.
Hugot nga nagsunod sa 2018 ang Batch 2021 nga mitapos sa elimination nga may 4-4 nga baraha.
Ubos sa format, ang top four maoy mo-qualify sa best-of-three semifinals series diin ang no. 1 team mosakbang sa no. 4 samtang ang no. 2 maoy maparang sa no. 3.
Ang Carampatana Food Inc. Batch 2012 nga pormal nga mipalagpot sa sa Storage Town Batch 2015, 89-80, maoy solidong nag-angkon sa ikaduhang puwesto nga may 6-1, ug gisundan usab kini sa Batch 2013 (6-2).
Sa Division B, mipabaha og 25 puntos si Gabe Valenzuela, midugang og 15 si Kyle Wong ug gipahugtan sa Casino Ethyl Batch 2010 ang ilang paghupot sa ikatulong luna , 5-2, pinaagi sa 77-68 nga kadaugan batok sa Batch 2006 (1-6) nga gisuportahan sa Prince Warehouse Inc., Laptap Enterprises ug MYMC Group.
Gilubong usab sa Batch 2004 (4-4) ang Batch 2005 (1-6), 83-61, ubos sa pagpangulo ni Franco Te nga may 13 puntos ug 15 ka rebounds. Si Christopher Consunji mitali usab og 14 puntos.
Sa pildirong 2005, si Elddie mikolekta og 33 puntos.
Sa Division A, gidabodabohan sa AutoLAB (1999) ang Batch 1992, 71-49. Sa kadaugan, nakasiguro na og luna alang sa semifinals ang AutoLAB (5-2) samtang mitidlom ngadto sa 1-6 nga baraha ang 1992.
Pabilin nga limpiyo ang record sa Xchange Forex, 7-0, human nila gilubong buhi ang Batch 1998 (3-4), 79-51.
Wa usay kaluoy nga milampornas ang Batch 1994 (4-2) sa Batch 2002 (0-4), 120-68.