Mga duwa karon:
5:15 pm- CIT-U batok DBTC (High School)
6:45 pm- Verallo batok UV (College)
Suyawan pagkutlo sa defending champion University of the Visayas (UV) Green Lancers ang ikatulo nilang sunodsunod nga kadaugan sa samang gidaghanon nga mga duwa sa ilang pagpakigsangka sa Felipe Verallo Foundation College (FVFC) Blue Dragons sa main game ning Huwebes, Oktubre 12, 2023, alas 6:45 sa gabii, sa Cebu Schools Athletic Foundation Inc. (CESAFI) basketball college division sa Cebu Coliseum.
Sa premiro nilang tahas, ningsubay ang Green Lancers og malisod nga dalan una nila nabuntog ang University of the Philippines (UP)-Cebu Fighting Maroons, 59-56.
Sa ikaduha nilang duwa, nagbangis na’g sugod ang Green Lancers ug ilang gipanglampornas ang Cebu Institute of Technology University (CIT-U) Wildcats, 90-60.
Batok sa Blue Dragons, usa sa bag-ong miyembrong teams sa CESAFI nga gikan sa Bogo City, dili ikalimod nga dakong inilog ang Green Lancers.
Ang Blue Dragons nasubhan og kapildihan sa nag-una nilang duha ka mga tahas batok sa Cebu Roosevelt Memorial Colleges (CRMC) Mustangs, 65-63, ug University of San Carlos (USC) Warriors, 56-40.
Sa high school division, parehong mosuway paglansang sa labing una nilang daog ang CIT-U Wildkittens ug Don Bosco Technological Center (DBTC) Greywolves sa ilang panagsangka sa premirong duwa sugod sa alas 5:15 sa hapon.
Ang Wildkittens adunay 0-1 nga rekord samtang ang Greywolves naghupot og 0-3 nga baraha.
Sa laing bahin, gipangpukan sa University of Southern Philippines Foundation (USPF) Panthers ang Benedicto College Cheetahs, 74-65, sa college division niadtong Martes sa gabii, Oktubre 10, 2023.
Ang Panthers ningsaka sa 3-0 nga rekord samtang ang Cheetahs nahagbong sa 1-2 nga baraha.
Sa high school division, gipangmakmak sa Cebu Eastern College (CEC) Dragons ang City of Bogo Science and Arts Academy (CBSAA) Trailblazers, 80-61.
Ang Dragons ninglupad sa 3-1 nga baraha samtang ang Trailblazers ningsukarap sa 0-3 nga rekord.