OPISYAL na’ng gitangtang ni Gilas Pilipinas coach Yeng Guiao ang labing hinigo sa iyang puwersa nga si Marcio Lassiter alang sa ilang kampanya sa 2019 FIBA Basketball World Cup nga sugdan karong Agusto 31 sa China.
Naangol ang tuhod sa usa sa mga pambato sa San Miguel Beermen sa Philippine Basketball Association (PBA) Commissioner’s Cup semi-finals ug nagkinahanglan kini’g taas nga panahon sa pagpaalim.
Huwaton unta ni Guiao nga hingpit nga maalim ang angol ni Lassiter apan dili na kini makaabot sa ilang kampanya sa matag upat ka mga tuig nga kompetisyon. “Nag-usap na kami ni Marcio, hindi siya aabot,” matod ni Guiao sa PBA.PH. (ESL)