Gisugat og kapildehan ang pagbalik og duwa ni LeBron James sa Los Angeles Lakers batok sa Boston Celtics, 130-108 didto sa TD Garden.
si Jason Tatum maoy nimasaker sa Lakers pinaagi sa iyang 37 puntos ug 11 rebounds samtang pilderong Lakers gipangulohan ni Anthony Davis kinsa nihipos og 31 puntos samtang si James niamot og 23 puntos ug 6 rebounds.
Ang star sa Celtics nga si Tatum nakakuha og igo nga suporta sa iyang mga kauban human nilabni og 22 puntos si Marcus Smart, 21 puntos ang gimugna ni kanhi Lakers guard nga si Dennis Schorder ug 18 puntos ang gitampo ni Al Horford aron mabalik sa .500 ang Celtics kinsa nagkupot na karon sa 8-8 win-lose record.
Si James napakyas pag-apil sa walo ka sunodsunod nga duwa gumikan sa injury sa iyang tiyan diin ang Lakers adunay 3-5 win-lose record samtang siya nagpaalim sa iyang angol diin ang Lakers napilde sa ilang upat ka road games.
Ang Boston ug Lakers kinsa adunay 34 ka NBA championships (tag 17 sila) sa 75 ka kampyonato sa NBA daw nabanhaw ang ilang panagribal gumikan sa kainit sa crowd sulod sa TD Garden nga daw gihisama na sa playoffs ang sitwasyon.
Ang Lakers nipasulod sa siyam gikan sa ilang 12 ka itsa sa first quarter aron biyaan ang Celtics 38-30 ug niabot pa kini sa 14 ang labaw pagsugod sa 2nd quarter apan gihinayhinay kini og kitkit sa Celtics gikan sa init nga opensa ni Tatum hangtod nga ilang nalabwan og one point ang Lakers, 61-60 sa paghuman sa first half.
Samtang padayon nga nagbangis ang Golden State Warriors bisan paman sa pagpalta sa ilang superstar nga si Stephen Curry batok sa Detroit Pistons, 105-102 sa Detroit.
Nihulip kang Curry si Jordan Poole kinsa nipabuto og 22 puntos sa first half gikan sa iyang 32 puntos nga season high aron pangulohan ang Warriors nga maoy NBA league leader dala ang 14-2 win-lose record.
Ang Warriors nisugod sa fourth quarter pinaagi sa ilang 16 puntos nga labaw ug nidaog sa duwa human nasipyat sa iyang tira sa tres silang Jerami Grant ug Frank Jackson sa closing seconds sa final canto.
Gipapahuway sa Warriors si Curry gumikan sa iyang injury sa bat-ang, usa ka gabii human ang two-time MVP ug league leading scorer nipaarak og 20 gikan sa iyang 40 puntos sa fourth quarter para sa comeback win batok sa Cleveland Cavaliers.
Ang No.1 pick nga si Cade Cunningham adunay 19 puntos ug 6 rebounds samtang 27 puntos ang giabag ni Jackson nga maoy iyang season high samtang 19 puntos ang giamot ni Grant.
Si Gary Payton II maoy nihulip ni Curry sa starting five sa Warriors.