GIPAKIGKITAAN sa mga NBA stars si kanhi US President Barrack Obama aron pangayuan og mga maayong tambag unsaon pagpadayon sa ilang protesta para sa kaangayan sa mga itom ug puti sa Amerika.
Matod sa report ni Shams Charania sa The Athletic and Stadium, ang kanhi presidente kinsa African-American og kaliwat nitambag nilang Lebron James, Chris Paul ug kaubanan nga mobalik og duwa sa NBA bubble.
Ang panagtagbo nilang Obama ug mga NBA stars nunot niadtong pagboto nila nga undangon ang NBA season human sa pagpusil sa police ni Jacob Blake didto sa Wosconsin niadtong Lunes.
Gipusil ni Police Officer Rusten Sheskey si Blake sulod sa pito ka higayon sa bukobuko diin siya gialigahan nga nakig-away sa duha ka babaye.
Bisan paman kon aduna nay kasigurohan nga mabuhi siya, apan paralisado na kini gikan sa iyang hawak paubos apan wala pa masiguro kon permanente na ba.
Matod sa report, ang mga players gitambagan nga moumol og komitiba para sa aksyon sa mga player diin apil ang kanhi presidente.
Ang NBA ug WNBA Players Association nipagawas og mensahe kagahapon nga mobalik na ang playoffs diin ilang gilista ang mga inisyatiba nga buhaton sa duha ka habig.
Apil na niini ang pag-umol sa social justice coalition diin adunay representatives nga gilangkoban sa mga players, coaches, ug team owners para maoy mo-focus sa isyu apil na ang voting access, civic engagement and meaningful police and criminal justice reform.