Nakapugnit og lingkuranan sa semi-finals round ang Olympic qualifier nga si Eumir Marcial nga way singot nga niagas human mi-back out ang Mongolian niyang kontra nga si Otgonbaatar Byamba Erdene tungod sa piang niini sa abaga sa ASBC Asian Men’s and Women’s Boxing Championships sa Dubai niadtong Miyerkules sa gabii, Mayo 26, 2021.
Si Byamba-Erdene, kinsa sama kang Marcial usa usab ka professional boxer, miatras sa away human naangol ang abaga niini atol sa iyang preliminary bout batok sa Iraqi nga si Ridha Talib Jabbar sa middleweight class.
Niini, ang 2019 World Championship silver medalist ug Southeast Asian Games gold medalist, moabante sa semis nga makigsanka ni Uzbek Jafarov Saidjamshid, kinsa midaog, 5-0, batok ni Omurbek Bekzhigit Uulu sa Kyrgyzstan.
Naghatag na usab kini og kaseguroan ni Marcial alang sa bronze medal uban sa laing tulo ka Pinoy fighters nga sila si flyweight Mark Lester Durens, bantam Junmilardo Ogayre ug kanhi world ug light fly women’s champion Josie Gabuco.
Si Gabuco, isip top seed, makigsinukliay sa kumo batok sa taga Uzbekistan na si Gulasal Sultonavieva.
“We have four in the semis. Josie and Eumir haven’t fought yet, both seeded No. 1 in their respective weight categories,” matod ni Association of Boxing Alliances in the Philippines (ABAP) secretary-general Ed Picson.
Si Duren mosakbang ni Daniyal Sabit sa Kazakhstan samtang si Ogare makigbatok ni Asian Gold Games gold medalist Mirazizbek Mirzahalilov sa Uzbekista. (JBM)