Niini pa lang puntoha, andam na si Oriental and Pacific Boxing Federation (OPBF) silver featherweight champion Milan “El Metodico” Melindo alang sa iyang pagdepensa sa titulo batok kang Korean prospect Jong Seon Kang karong Hulyo 1, 2023 sa South Korea.
Mao kini ang gipadayag sa bag-ong trainer ni Melindo nga si Alain Garces.
“Ang training ni Melindo is so far so good. Ready na mi,” matod ni Garces.
Mao kini ang labing unang depensa ni Melindo sa titulo nga iyang naangkon pinaagi sa dominanteng unanimous decision nga kadaugan batok kang Thai Chaiwat Buatrathok niadtong Enero 11, 2023 sa Cebu City Sports Center (CCSC).
Si Melindo, 35, kinsa sakop sa Prime Stags Sports sa Talisay City, Cebu, miingon nga nakig-sparring siya og dekalidad nga mga boksidor alang ning maong tahas.
Lakip sa mga gika-sparring ni Melindo mao ang kanhi world champions nga sila si Nonito “Filipino Flash” Donaire ug John Riel “Quadro Alas” Casimero.
“Three months ang among preparation. Nag-spar ko og quality boxers, quality fighters. Amo sab gi-study-han ang dula sa akong kontra kay ang akong kontra is ang height 5’8”. So taas siya nako kaayo,” batbat ni Melindo, kinsa adunay 39-5, 14KOs nga rekord.
Adunay pa’y laing lima ka mga boksidor ang gi-sparring ni Melindo.
“Daghan ko’g gi-sparring para wide akong hunahuna inig abot sa dula,” pasabot ni Melindo, kinsa kanhi International Boxing Federation (IBF) ug International Boxing Organization (IBO) world light flyweight champion.
Si Kang, 21, naghupot og 16-1-2, 9KOs nga rekord. (ESL)