Sa labing unang higayon, adunay gisunod nga bantugang anime character si Milan “El Metodico” Melindo aron pag-engganyo sa iyang boxing fans nga mosunod sa iyang away.
Sa iyang pagdepensa sa iyang Oriental and Pacific Boxing Federation (OPBF) silver featherweight title batok kang Korean prospect Jong Seon Kang karong Hulyo 1, 2023 sa South Korea, gisuon ni Melindo si Vegeta, usa sa mga bida sa Dragon Ball Z.
Ning-awaya, mosaka si Melindo nga kolor blonde ang iyang buhok ug hasta kilay.
Sa usa ka interbyu nga na-post sa iyang Facebook account, gipangutana si Melindo kon usa ba kini ka lucky charm kaniya ang pagsuon ni Vegeta.
“Dili.... Super Saiyan ni, Prince Vegeta. Kay si Goku si Quadro Alas man to,” tubag ni Melindo, kinsa naghisgot ni kanhi world champion John Riel “Quadro Alas” Casimero.
Gitataw ni Melindo nga dili siya hilig magpakolor sa iyang buhok apan nakahunahuna siya niini aron mas makakuha og atensyon.
“Dili ko hilig magpakolor sa buhok. Pang-enggayo lang ni sa public, sa akong boxing fans,” pasabot ni Melindo, kinsa kanhi world champion.
Nanghinaot si Melindo nga suportahan siya sa iyang mga sumosunod.
“Moadto ko sa Korea para depensaan ang akong bakos. Hopefully akong madala og balik ang akong bakos,” dugang ni Melindo, kinsa sakop sa Prime Stags Sports sa Talisay City.
Si Melindo naggunit og 39-5, 14KOs nga rekord samtang si Kang adunay 16-1-2, 9KOs nga baraha. (ESL)