Pilde apan mapasigarbuhon sa iyang performance si Pinoy boxer Milan Melindo sa iyang away batok sa batan-on nga challenger nga si Jong Seon Kang alang sa Oriental Pacific Boxing Federation silver featherweight title(OPBF) sa South Korea.
Sa tulo ka mga boxing judge, duha kanila niiskor og 96-94 samtang ang usa 97-94, pulos nipabor kang Jong Seon.
Sa unang mga round, daw kontrolado ni Melindo ang away gumikan sa iyang kasinatian batok sa batan-on ug agresibong Koreano apan sa ikapitong round didto gihulagway ni Melindo nga ni-apply og dirty tactic ang Koreano.
“In 7th (round) nangita sila og paagi , that’s why he made a cut and it is an illegal punch and the referee did not know because this one (nagpakita sa tumoy sa kumagko sa glove), naa sa tumoy ba, open glove that made the cut. Kon gusto mo modaog nga limpyo, dapat limpyo mo moduwa,” padayag ni Melindo sa usa ka interbyu human sa away sa Sabado, Hulyo 1, 2023.
Si Melindo namahayag nga bisan sa iyang kapildehan, andam gihapon niyang ipamatuod nga aduna pa siyay ikabuga bisan kon 35 anyos na siya ug kini iya nalang gisalig sa iyang mga handler.
Si Pocholo Padilla, presidente sa Prime Stags Sports, nagkanayon nga nidaog sa unang unom ka rounds ang ilang boxer.
Nihulagway nga ‘illegal’ ang sumbag nga nakaigo nga maoy nakagisi sa dapit sa kilay ni Melindo apan ilang gidawat ang kapildehan labi na nga dayo ra sila sa South Korea. Human sa away, ang Koreano nibisita sa dugout ni Melindo isip pagpakita sa respeto ngadto sa Pinoy boxer nga kanhi world champion.
Gawas kang Padilla, niuban sa entourage ni Melindo silang Atty. John Jigo Dacua, Cebu City Councilor Rey Gealon, Ramil Ayuman ug uban pa.
Si Melindo maoy naghupot sa IBF ug IBO light-flyweight titles niadtong 2017. / PAC