Depensaan na ni Filipino Milan “El Metodico” Melindo ang iyang Oriental and Pacific Boxing Federation (OPBF) silver featherweight title batok kang Korean Jong Seon Kang ning Sabado sa gabii, Hulyo 1, 2023, sa Gwangju City, South Korea.
Mao kini ang labing unang higayon nga depensaan ni Melindo ang titulo nga iyang naangkon pinaagi sa dalaygong unanimous decision nga kadaugan batok kang Thai Chaimat Buatkrathok niadtong Enero 11, 2023 sa Cebu City Sports Complex.
Si Melindo, kinsa kanhi International Boxing Federation (IBF) ug International Boxing Organization (IBO) light flytweight champion, mosagubang sa labing una niyang away sa South Korea.
Hinuon dili na bag-o alang ni Melindo ang pagsagubang og tahas sa gawas sa Pilipinas.
Gani naangkon niya kaniadto ang IBF light flyweight title sa Japan pinaagi sa makapakugang nga 1st round TKO nga kadaugan batok kang Akira Yaegashi niadtong 2017. Ning bag-o niyang tahas, kapin sa tulo ka mga buwan ang preparasyon ni Melindo, kinsa sakop sa Prime Stags Sports sa Talisay City.
Ning awaya, ang kanhi ALA boy makigbinukbokay sa mas batan-on ug mas taas nga kontra.
Si Melindo, 35, aduna ra’y gitas-on nga 5’2” samtang si Kang, 21, adunay gitas-on nga 5’8”.
Hinuon, daan nang miingon si Melindo nga dili problema kaniya ang pagpakigharong og mas taas nga kontra.
Si Melindo adunay 37-5, 14KOs nga rekord samtang si Kang, kinsa usa sa sumosulbong nga mga boksidor sa South Korea, naghupot og 16-1-2, 9KOs nga baraha. (ESL)