Anaa pa man tuod sa tungatungang bahin sa kinatibuk-ang season, apan daw og sa milutaw ug misihag na ang katuyoan sa Pilipinas VisMin Super Cup .
Sa pagkatinuod lang, sa dihang gihulma pa lang daan ang torneyo daghan ang wa magtuo nga kini mahinayon tungod sa kalisod sa panahon karon.
Kinsa bay magdahom nga matigayon kini nga gani ang ubang mga dagkong lega lakip na sa ubang mga nasod ang miatras sa ilang pagpahigayon tungod ning pandemya nga miratsada sa tibuok kalibutan.
Gani mga dagkong lega sa ubang mga nasod ang napugos sa pag-undang ug paghikling lang una aron paglikay sa maong virus.
Ug tungod niini, daghang mga atleta ug ingon man kadtong mga nalambigit sa natad sa paugnat sa kusog ang napurga. Nawad-an og kapanginabuhian.
Apan taliwala sa mahagiton nga pagkatukod sa Pilipinas VisMin Super Cup daw og sa nahupay ang pipila sa atong mga kaigsuonan sa natad sa paugnat sa kusog.
“Mokuyog kog panagat para naa lang gyuy makaon. Pagkahibawo nako nga naay VisMin morag nagana-gaan akong pamati kay nasulbad na akong problema,” matod ni Gileant Delator, pointguard sa KCS-Mandaue City.
Si Rocky Chan, ang chief operations officer sa VisMin Cup, sa sayo pa, subling namahayag nga ang katuyoan sa VisMin Cup mao ang paghatag og trabaho niadtong mga atleta nga maoy una gyung naigo sa pandemya.
“We are here not to compete the other leagues, but to give job to our athletes and staff of the teams during this pandemic era,” kini maoy gibalik-balik ni Chan sa matag interview.
Aron mahatagan og katumanan, gisunod sa VisMin Cup ang tanang mga rekisitos nga gilagda sa Games and Amusement Board (GAB) isip bag-ong professional basketball league sa nasod.
Bug-os usab nilang gipatuman ang mga health protocols nga gimando sa Inter-Agency Task Force (IATF).
Kaabag ni Chan sa maong paghulma mao ang maabtikon nga secretary-general nga si Chelito Caro kinsa way puas nga naglihok sa matag adlawng bulohaton hangtod nga nahitsas na ang tanan.
Gawas sa game fixing allegation sa duwa tali sa ARQ Builders Lapu-lapu City Heroes ug Siquijor niadtong Abril 14, ang tanang duwa hapsay nga natigayon.
“We put the house in order and considered the sad episode as part of the growing pains of a young league. We learned from it and implemented some strict measures to help prevent such an incident from ever happening again,” matod ni Chan sa interview ni Homer Sayson sa Spin.ph.
“More work needs to be done. We are not here short-term,” dugang ni Chan.
Kudos sir Rocky, coach Carz ug sa tanang staff sa VisMin Super Cup.
* * *
Taodtaod gyud nga wa ta ka padangat ning atong lindog gumikan sa mga kakulian nga dili nato kapugngan.
Nakasugat man gud ta og dili maayong kasinatian sa atong panglawas. Atong gilugwayan og duha ka buwan ang pagbakasyon aron hingpit gyud ta nga maalim.
Akong pasalamat sa Kahitas-an nga gisanong niya ang atong hugot nga panalangin ug pag-ampo ug ingon man ngadto usab sa akong pamilya, asawa, mga igsuon, anak ug mga kaperyentihan nga mitimang atol sa akong pagpanglimbasog. Daghang salamat. (jun.migallen22@gmail.com)