HAYAG ang posibilidad nga magpabilin si Kawhi Leonard sa Toronto Raptors, bisan pa man tuod og iyang gisalikway ang $21.3 million nga player option sa team alang sa sunod season.
Unrestricted free agent na man si Leonard sugod karong Hunyo 30 ug mahimong motapon kini ngadto sa laing team nga may igong kantidad nga ikatanyag kaniya.
Apan ang tinubdan nagkanayon nga gihatagan sa three-time All-Star ang Raptors og prayoridad kon itandi sa ubang mga team nga nitanyag og saktong kantidad kaniya.
Kini human masuta nga aduna pay dakong haw-ang sa ilang salary cap ang Raptors nga mas makakombinsi pa ni Leonard.
Andam ang Rapotrs nga motanyag og $190 million ngadto ni Leonard sulod sa lima ka tuig. Sa ato pa, makadawat siya og $38 million matag tuig.
Ang ubang mga teams nga interesado niya, makahatag lang niya og $141 million sulod sa upat ka tuig o $35.3 million ang kada tuig.
Kini maoy nakabintaha karon sa Raptors kon itandi sa uban nga gusto ni Leonard.
Kon way kakulian, sa gihapon, ikauban ni Leonard sila si Kyle Lowry, Serge Ibaka ug Fred VanVleet kinsa aduna pay usa ka season nga kontrata sa Raptors.
Si Pascal Siakam hangtod pa sab sa 2021 ang kontrata niini ug dako usab ang purohan nga gamiton ni Marc Gasol ang iyang $25.6 million nga player option alang sa sunod tuig.
So intact gihapon ang first five sa Raptors, at least sa sunod season.
•••
Sa niaging semana, nabaniog usab ang balita nga gusto na ni Houston Rockets point guard Chris Paul nga magpa-trade human gikataho nga aduna silay panagbikil ni James Harden.
Pero unsa gud diay nga hugot man kining gipanghimakak ni Paul. Gani ingon niya nga wa gyud siya mo-demand og trade ug gani pabilin siyang malipayon sa Houston.
Ang general manager sa Rockets nga si Darryl Morey mikompirmar niini nga wa mohangyo si Paul nga magpa-trade.
Bisan tuod og dunay laraw sa pagpalig-on pa sa team, apan daw og ilang nalantawan nga mas hayag-hayag ang ilang tsans nga makasulod sila sa finals sa sunod season tungod sa kausaban sa ubang mga teams sa Western Conference ilabi na sa sitwasyon karon sa defending champion Golden State Warriors.
Pero sa edad nga 34-anyos nga duna pay nahabiling $124 million sulod sa tulo ka tuig nga kontrata, lakip na ang player option sa katapusang tuig niini, mora og lisod na ibaylo si Paul.
Di sab kaayo sila ka lihok og maayo sa free agency tungod kay nagapos na ang ilang budget sa ilang mga star player.
Tiaw mo bay si Paul makakolekta og $38.5 million sunod season, James Harden $37.8 million, Clint Capela $16.4 million ug $14.1 million kang Eric Gordon.
Si Paul nag-average og 15.6 points per game, gawas sa iyang 8.2 assists, 4.6 rebounds ug duha ka steals sa 58 ka duwa sa regular season.
Pero tak-om man sila sa giingon nga bikil tali nila ni Paul ug Harden.
Kini maoy salikwaot nga paminawon sa Rockets kay lisod magka-teamwork kon dunay dumot sulod sa team, kay posibli man unya nga mabuak ngadto sa duha ka grupo ang team ilabi na kay mga star players ang nagkaaway.
Hangtod nga dili ni mahusay, di ta mag-expect nga mamaayo ang pagsulbong sa Rockets. (jun.migallen22@gmail.com)