Di siya ikatandi sa ubang mga mayor ilabi na kadtong mga namunoan sa dagkong lungsod, pero kon ang kaagresibo alang sa kalambuan maoy hisgutan dili sab siguro siya hibintahaan.
Kini maoy akong naobserbahan ni Mayor Fritz Lastimoso sa Alcantara, ang usa sa pinakagamayng lungsod sa probinsiya sa Sugbo.
Ang Alcantara nga aduna lay siyam ka mga barangays, usa ka fifth class nga munisipalidad ug gihulagway nga sleeping town of the Cebu South.
Pero alang ni Mayor Fritz dili kini babag nga mapalambo ang maong lungsod ubos sa iyang administrasyon kon dili usa kini ka dakong hagit sa iyang liderato.
Iyang giangkon nga sukwahi sa ubang lungsod, wa gyud siyay matawag nga tourist spot nga makadani ug mabisitahan sa mga lokal o langyaw nga mga turista.
Lisod usab dagsaan og mga dagkong industriya tungod lagi sa kagamay sa dapit.
Kini maoy nagtukmod sa batan-ong mayor nga ang sports tourism maoy iyang palambuon ug himuong usa sa mga behikulo aron mahimong inila ang iyang lungsod.
Way back in 2021, bulan sa Abril, ang Alcantara maoy nahimong atraksiyon sa sports sa tibuok nasod sa dihang mi-host kini sa 1st VisMin Cup Visayas leg basketball championships.
Nabaniog ang maong lega kay gawas nga bag-o pang natukod, bugtong pa gyud kini nga lega sa Pilipinas nga nagtikaw-tikaw niadtong panahona taliwala sa grabing pagkatap sa coronavirus. Didto nasentro ang atensiyon sa mga sports aficionados.
Risgo man tuod ang pag-host niadto apan hugot gyud nga gipatuman ang mga health protocol nga gilagda sa Probinsiya sa Sugbo ug sa departamento sa panglawas.
Apan ang mga kalisdanan ug kahago sa pag-host sa maong lega nga milungtad og dul-an sa duha ka buwan, daw ug sa nagbunga.
Sukad niadto, tungod sa dakong kalampusan tunhay nga pagpadagan, daghan nang nagpakisusi ug gusto na nga mopahigayon og mga dagkong tournament sa ilang lungsod.
Di lang kay basketball kon dili daghan pa unyang mga kompetisyon nga ilang gihan-ay na.
Ning bag-ohay lang nakapahigayon na usab sila og enduro trail. Unya aduna usab silay umaabot nga firing range, diin makapahigayon na pud unya sila og mga shooting competitions, volleyball, chess ug uban pa.
Year-round ang programa ni Mayor Fritz sa sports nga for sure maka influence usab ni sa lokalidad.
Naikag kog suwat niini, kay bisan tuod sa kagamay sa lungsod pero nakakuha na og dakong atensiyon gikan sa mga dagkong organisasyon.
Hinaot mahimo kining inspirasyon sa ubang lungsod nga adunay igong kapabilidad.
Keep up the good work, Mayor. Way sukod sa gamay apan hapsay nga pagkadala.