NAHULBOT sa defending champion Minglanilla Archangels ang katapusang luna alang sa quarterfinals round sa 2nd Cebu Governor's Cup Inter-cities/municipalities 21-under basketball sa dihang ilang gihutdan sa enerhiya ang Naga City Electrifiers, 76-72, sa knockout match sa CebU Coliseum niadtong Huwebes sa gabii.
Ang maong duwa maoy silbing replay sa kontrobersiyal nga panag-engkuwentro tali sa duha ka mga teams niadtong Abril 23 diin midaog na unta ang Naga pinaagi sa tres ni Clutch Atilano sa katapusang .07 seconds, 93-91.
Apan nasuta nga niadtong higayona, unom ka mga players sa Naga ang anaa sa sulod hinungdan nga mipasaka og protesta ang Minglanilla.
Human sa makuting pakisusi, nahukman sa technical committee nga "no contest" ang maong panag-engkuwentro hinungdan nga gi-replay ang kinatibuk-ang duwa.
Sama sa naandan, ang sensational nga si Steve Nash Enriquez, ang team captain sa Minglanilla, mitali og 22 puntos aron pangulohan ang iyang team.
Hinuon, gituohan nga kadto maoy katapusan niyang duwa sa Minglanilla sanglit gikatakda na kining moadto sa kaulohan aron moduwa sa National University high school teams.
Unang ikasangka sa Minglanilla sa quarterfinals round ang Sibonga nga maoy mo-host karong Hunyo 10.
Samtang sa North Division, gisakmit sa host Medellin ang solong liderato sa Cluster B human nila malubong ang Balamban, 97-82, nga maoy ilang ikaduhang daog sa playoffs. Ang Bantayan, nga napildi sa Balamban niadtong Martes, nakabawi usab pinaagi sa pagpukan sa Tuburan, 103-93.
Nagtabla na karon ang Balamban, Tuburan, ug Bantayan sa standing, 1-1, matag usa.
Sa South divison, way kaluoy nga gilampornas sa Barili ang bisitang Ginatilan, 107-58, samtang gibuntog usab sa Dumanjug ang Alegria, 77-63, sa Barili Sports Complex.
Ang Dumanjug ug Barili pulos na karon naghupot og 1-1 nga baraha. (JBM)