Human sa makutas nga panagtigi sa elimination round ug sa semifinal series, ang Mitsubishi Mandaue maoy nakalabni sa unang kampiyonato sa bag-o lang natapos nga Sugbo Basketball League (SBL) Cebu Auto Dealers tournament nga gipahigayon Huwebes, Septiyembre 15, 2022, sa Capitol Parish Gym, Escario St., dakbayan sa Sugbo.
Gipukan sa Mitsubishi Mandaue ng Gateway Motors, 62-54, sa kulbahinam nga panag-engkuwentro nga pipila ka higayon nga nagpulipuli og sakmit ang matag habig sa labaw.
Daw og sa paingon na sa ganghaan sa kadaugan ang Gateway human kini maoy nagkontrolar sa duwa sa unang duha ka mga kwarters.
Apan ubos sa pagpangulo ni Jonas Kintanar, diha na sa third mihinay-hinay og kabat ang Mitsubishi Mandaue aron ilogon ang momento sa duwa.
Si Kintanar mitali og 12 puntos, pito ka assists ug upat ka rebounds nga igo na kaayo niyang makapahimong most valuable player (MVP) sa finals.
Gawas kang Kintanar, maayo usab nga nakasuporta sila si Christian Jumamoy ug Andy Eyas. Samtang sila si Gladyz Ygay ug Paul Laguros maoy nangulo sa napukan nga Gateway.
Ang kampiyon makadawat og P20,000 nga ganting salapi samtang P10,000 ang mapunta usab sa runner up ug ingon man tropeyo. Ang MVP aduna usay tropeyo ug bag-ong sapatos.
Katorse ka mga teams ang misalmot sa torneyo nga gisugdan sa sayong bahin sa niaging buwan.
Subay niini, gipahibawo sa mga organizers nga sila si Michael Sereno ug Orly Rizane nga sunod buwan hayan masugdan na usab ang Season 2 sa maong lega.
Andam silang modawat og laing pang mga partisipante nga nagrepresentar sa kompaniya nga car dealers ra usab. (JBM)