Ang pagbangon gikan sa masakit nga kapildihan maoy anaa karon sa alimpatakan sa Tubu Master-Moalboal sa 1st Mayor Fritz Lastimoso Inter-town Basketball tournament sa lungsod sa Alcantara, Sugbo.
Ang Tubu Master nga gipanag-iya sa negusyanting si Rodolfo Borja mosuway sa katakos sa Ronda Team karong Sabado, Agusto 13, 2022, sa tinguha nga makakuha pa og luna alang sa semi-final round.
Sa kasamtangan, ang Tubo Master adunay 1-2 nga baraha human kini nakaangkon sa ilang ikaduhang kapildihan sa miaging semana sa mga kamot sa Alagad Dumanjug, 89-92, sa duwa nga gihamok og kontrobersiya.
Pero ang gikasagmuyo ni Borja mao ang surpresang desisyon sa mga referee nga alang kaniya dili makiangayon.
Gitumbok ni Borja mao ang pagpahamtang og technical foul ngadto sa iyang reinforcer nga si Emmanuel Calo nga bisan og wala kini gihimo atol sa gamayng komosyon nga nahitabo sa naghinapos nga bahin sa 1st half.
“Siya (Calo) ang didto sa sawog, siya ang gihasmagan. Wa gani siya mosukol unya niisa pa sa kamot,” matod ni Borja.
“Unya gi technical foul na hinuon ug di pa ka sulod within three minutes. Didto naguba ang among duwa, unya naka-rally sab og dako ang kontra.”
Duha na man tuod ang ilang pildi, apan wala gihapon sila mawad-i og paglaom nga makasulod sila sa semi-finals.
Human sa Ronda, malisod nga tahas ang sagubangon sa Tubu Master sanglit ila na man sab nga ikasangka ang defending champion Argao sa Lunes.
Ang torneyo nga gisalmutan sa 10 ka mga teams nga nagrepresentar sa nagkalainlaing local government, maoy usa sa mga kalihukan ning naghinangat nga kapistahan sa lungsod sa Alcantara.
Ang mga partisipante gibahin ngadto sa duha ka division diin ang matag usa ka grupo langkuban og lima ka mga teams.
Ang top two teams sa matag division maoy mag-abot sa cross-over semifinals aron pagdeterminar kon kinsa ang mag-ilog alang sa kampiyonato.