SUBLING masaksihan ang pagsaka ibabaw sa ring ni four division champion Donnie "Ahas" Nietes didto sa United Arab Emirates karong Abril 3, 2021.
Ikauban ni Nietes nga moasdang sa Tungatungang Sidlakan si Albert Pagara apan wala pa matino ang ilang mga kontra.
Kini human siya nipirma og kontrata sa MTK Global ug D4G Promotions aron mabawi ang nausik nga mga oportunidad dihang wala siyay away sulod sa duha ka tuig.
Ang kanhi utility sa ALA Gym apan nahimong world champion nalipay sa bag-ong lakang sa iyang boxing career.
Si Nietes kinsa nag-inusarang Pinoy nga adunay labing taas nga record sa pagdepensa sa iyang bakos ug labing dugay nga nahimong kampyon wala na makaaway og balik human sa iyang kadaugan batok ni Kazuto Ioka sa Japan para sa WBO super flyweight title niadtong Disyembre 31, 2018 sa Macau.
"He's already had tremendous success in his career having won world titles in four-weight classes, and we're confident of securing some huge fights for him in the always-entertaining super-flyweight division," matod ni Paul Gibson, chief strategy officer sa MTK Global.
Ang 38 anyos boksidor nalipay nga mahatagan siya og kahigayonan nga ikaatbang ang mga sikat nga kontra ug gusto pa niyang lugwayan ang 18 ka tuig na nga pagpamoksing.
"I'm not done yet and I am now hoping to get a fight with (Juan) Estrada, (Srisaket) Rungvisai and Chocolatito (Roman Gonzalez)," padayag ni Nietes.
"He still has his skills, speed, power and quickness. We just need to perfect it because he had a long layoff. We need to consistently train so that we can perfect his timing," padayag ni coach Edmund Villamor. (PAC)