NASAGMUYO ang kampo ni ALA fighter Donnie Nietes human miresulta sa kontrobersyal nga split draw ang away sa gitawag og “Ahas” batok sa kababayang si Aston “Mighty” Palicte kagahapon sa inilugay sa bakanteng World Boxing Organization (WBO) super flyweight title sa The Forum sa Inglewood, California.
“Disappointed lang gyud mi kay klaro man gyud tong daog si Donnie. Wala man gyu’y klarong igo si Palicte kay permi man masagang ni Donnie. Mas klarong nakasulod ang punches ni Donnie,” matod ni Edito Villamor, ALA gym head trainer, sa pagpakighinabi ning mantalaan sa messenger call.
“Sa later rounds, from 10 to 12, wala na gyud to si Palicte. Nakuha na gyud si ni Donnie.” Sa punch count statistics nga napatik sa AP, si Nietes nakapasulod og 194 ka mga sukmag labaw og 70 kumpara sa nahimo ni Palicte.
Usa ka judge mipadaog kang Nietes, 118-110, ang laing usa mipadaog kang Palicte, 116-112, samtang ang ikatulo mitabla sa away, 114-114.
Si Nietes, 36, mipadayag sab sa iyang pagsupak sa resulta apan iyang giklaro nga gidawat na lang kini niya.
“Ambot lang sa mga judges, giunsa to nila. Wa ta’y mahimo kay mao na ilang desisyon. Nahitabo man sab ni sa ubang boxer nga mas sikat pa nako,” matod ni Nietes, kinsa sulod na sa 14 ka mga tuig nga wala nakatilaw og pilde.
Ang longest reigning Filipino world champion mitataw nga andam siyang makig-away og balik kang Palicte kon itugot sa kahigayunan.
“Sa wa pa gi-announce ang result, nag-expect gyud ko nga daog ko pero tabla man diay. Wa ta’y mahimo, ako na lang gidawat. Open ko sa rematch kon naa man,” dugang ni Nietes, kinsa sulod na sa 11 ka mga tuig nga world champion.
Gipasabot ni Nietes nga ning puntoha, wa pa siya maghunahuna kabahin sa sunod niyang tahas ug nag-agad ra siya sa desisyon sa ALA Promotions.
Si Nietes, kinsa three-division world champion, napakyas sa iyang tinguha nga mahilakip sa grupo kauban sila si Manny Pacquiao ug Nonito
Donaire isip Pinoyng mga boksidor nga nakalangkat og world titles sa upat o labaw pa nga weight divisions.
Si Pacquiao nahimong world champion sa walo ka weight divisions samtang si Donaire sa upat ka weight divisions.
Si Nietes naggunit og 41-1-5, 23KOs nga rekord samtang si Palicte adunay 24-2-1, 20 KOs nga baraha. (ESL)