Nike midistansya kang Kyrie

Ang Nike temporaryong nisuspenso sa ilang relasyon tali kang Brooklyn Nets star Kyrie Irving gumikan sa iyang pag-post og link sa salida nga antisemitic kun makadaot batok sa mga Jew.

Ang lakang sa labing dako nga apparel brand gihimo human ang Nets nisuspenso kang Irving og lima ka duwa gumikan sa iyang pagbutang og link nga nagsunod sa anti-Semitism sa social media.

Sa primirong duwa sa Brooklyn nga wala si Kyrie, ang iyang team nidaog 128-86 batok sa Washington Wizards diin pito ka mga players ang nakaiskor og double digits pinangulohan ni Kevin Durant, kinsa nirehistro og 28 puntos, 11 ka assists ug 9 ka rebounds.

Human sa suspension, si Irving nangayo og pasaylo sa iyang gi post sa Instagram apan ang Nike nidistansiya una sa ilang endorser.

Gumikan niini, ang Nike dili na mo-release sa Kyrie 8 nga gikatakda unta nga ipagawas karong buwana.

“At Nike, we believe there is no place for hate speech and we condemn any form of anti-Semitism,” matod sa pamahayag sa Nike.

“To that end we’ve made the decision to suspend our relationship with Kyrie Irving effective immediately and will no longer launch the Kyrie 8. We are deeply saddened and disappointed by the situation and its impact on everyone,” dugang sa ilang statement.

Human sa post ni Irving, daghan ang nisaway kaniya sa social media dihang ilang nakita ang “Hebrews go Negroes: Wake up Black America,” ang salida nga gipagawas niadtong 2018 nga nakadawat og pagsaway sa lainlaing kanasuran gumikan sa anti-Semitic nga mga linyang gigamit. (PAC)