ANG Sugbuanong National Master (NM) nga si Rommel Ganzon maoy nilabni sa titulo sa ikapito nga hugna sa Cebu Executives and Professionals Chess Association (Cepca)-Alex Chua Super Blitz online tournament nga giduwa sa lichess.org niadtong weekend.
Si Ganzon nakitigom og 12.0 puntos sa 15-round Swiss System nga kompetisyon aron makuha ang unang pwesto sa torneyo nga gi-sponsoran nila US-based Cepcans Engr. Alex Chua sa California ug US Candidate Master Engr. Jojo Dondon sa Allen, Texas.
Si NM Gerardo Cabellon sa Laguna maoy nakakuha sa ikaduhag luna nga adunay 11.5 puntos. Ang Cebuano NM nga si Edsel Montoya maoy nikuha sa ikatulong pwesto, si Bryle Arellano sa Lapu-Lapu City mibulsa sa ikaupat nga luna, samtang si Ted Ian Motoyo sa Bacolod City maoy nikuha sa ikalima nga pwesto.
Ang mikompleto sa Top 10 mao sila Jimmy Ty Jr. sa Tacloban City, Jerome Villanueva sa Manila, NM Jasper Rom sa Cebu, NM Rogelio Enriquez Jr. sa Cebu ug NM Jeth ROmy Morado sa Manila.
Ang Top 3 nga Sugbuanon mao sila NM Jasper Rom, NM Elwin Retanal ug Allan Salietnes. Samtang sa special awards, nakuha ni Rogelio Enriquez Jr. ug Pererson Sia ang Cepcans A, samtang si Nicanor Cuizon ug Eladio Lim III maoy naghari sa Cepcans B. Ang top female player mao si Sheila Khan Sepanton. / RSC