Nagpadayon sa ilang pamanawkanaw ang Asian Orthopedics-Batch 2014 sa 25th Season sa Sacred Heart-Ateneo Alumni Basketball Athletics Association (Shaabaa) human kini mirehistro sa makabungog nga kadaugan batok sa RDAK PowerSports-Batch 2020, 80-60, sa Magis Eagles Arena sa Canduman, dakbayan sa Sugbo.
Niini, naglawig na sa sunod round ang Orthopedics nga may 7-0 nga baraha nga solidong naghupot sa liderato sa Division C sa tinuig nga torneyo.
Balansing ataki sa tanang departamento nga gipangulohan nila ni Josemaria Rafael Navarro ug Noriko Benedicto kinsa pulos mitali og tag 13 puntos maoy nagduot og samot sa PowerSports ngadto sa ikaunom nga kapildihan sulod sa pito ka duwa.
Saktong dominasyon maoy gipakita sa Orthopedics nga gani nakaposte kini og 23 puntos nga labaw, 51-74.
Nangulo sa PowerSports sila si Mitch Ivan Almodal nga may 16 puntos ug 15 puntos usab ang natampo ni Romeo Angelo Jabalon.
Ang Marjaztin Glazz Trading & Construction Batch 2008 nakapugnit nga gyud sa ilang unang daog sa pito ka duwa, 100-66, batok sa Batch 2005 (1-5).
Sa laing duwa, gipukan sa Suprea Ready Mixed Concrete Batch 2011 ang Batch 2006, 65-56, sa Division B ubos sa pagpangulo nila ni Bradley Bacaltos (12 puntos) ug Bernard Chioson (12 puntos).
Samtang mipakatap og 29 puntos si Jason Siy, midugang ug 14 puntos si Joel Co kinsa milangkat usab og 17 ka rebounds sa dihang gilatos sa Batch 1994 ang Speed Demon Batch 1996, 77-62.
Giligsan usab sa AutoLAB Batch 1999 ang Batch 2001, 71-61. Hinuon ang duha managsama na og standing, 4-2, sa Division A alang sa ikaduhang puwesto diin ila usab nga gikasawo ang Batch 1997.
Ang MDP Customs Brokerage misandig sa 36 puntos ni Rendell Senining aron buntogon ang SABR Solutions, 95-71.
Si Cris Fletcher Galvez mitali og 18 puntos ug 16 puntos usab ang nahagpat i AR-G Araw-araw.
Gilatos usab sa GEF Daikin ang Batch 2002, 67-56, samtang way kaluoy nga gidabodabohan sa Magis Medical Fund Batch 1997 ang Batch 1992, 65-37. (JBM)