SA pagpahigayon sa 7-Eleven Run 2019 karong Pebrero 3 sa sunod tuig nga dungang ipahigayon sa Luzon, Visayas ug Mindanao, adunay mas dakong rason ang mga modagan sa 42K category nga mas mokayod ug mas mosakripisyo sa training – ang naglagiting nga P500,000 nga bonus.
Mao kini ang gipabuhagay ni Philippine Seven Corporation general merchandise head Jose Ang Jr. kagahapon atol sa opisyal nga paglusad sa ikapitong edisyon sa lumba sa 7-Eleven Visayas Regional Office sa Trends Plaza bldg. sa dalan Ramos, ning dakbayan.
Gipasabot ni Ang nga ang makabuak sa national record sa men’s ug women’s divisions mao ang makabulsa sa bunos nga P500,000, wala pa’y labot niini ang ganting salapi. Alang lang kini sa Pinoy nga runners.
“To further encourage the runners, we will be giving a P500,000 bonus cash prize to somebody who can break the national record in men’s and women’s division,” matod ni Ang Jr.
Ang national record sa men’s division mao ang 2:18:44 nga narehistro ni Eduardo Buenavista, sa women’s division mao ang 2:38:44 nga natali ni Christabel Martes.
Kon molapas sa usa ang makabuak sa rekord, ang adunay mas ubos nga oras mao ang makapanag-iya sa bonus.
Ang Visayas leg sa lumba ipahigayon sa Cebu Business Park sa Ayala, ang Mindanao leg ipahigayon sa SM City Davao samtang ang Luzon leg ipahigayon sa Filinvest City, Alabang sa Manila.
Ang mga kategoriya sa lumba mao ang 500M kids, 3K, 5k, 5K Buddy, 10K, 10K Buddy, 16K, 21K, 32K ug 42K.
Ang rehistrasyon hangtod ra karong Enero 15 sa sunod tuig. ESL