Mikulit og bag-ong dungog sa nasod ang Bisaya nga boksidor Carlo Paalam human niya madaog ang gold medal sa men’s 54-kg division sa ASBC Asian Elite Men and Women’s Boxing Championships didto sa Amman, Jordan.
Ang Olympian nga lumad taga Cagayan de Oro mibihag sa mas inilog ug top seed Makhmud Sabyrkhan sa Kazakhstan aron labnihon ang championship sa iyang unang banat sa bantamweight division.
Ang 24-anyos nga si Paalam miduwa kaniadto sa flyweight division diin midaog kini og silver medal sa Tokyo Olympics sa miaging tuig.
Gilupig ni Paalam ang No. 2 Sanzhai Seidakmatov sa Kyrgyzstan pinaagi sa 5-0 shutout sa semis aron moabante sa title showdown batok kang Sabyrkhan.
Ang maong torneyo mao ang unang dako nga duwa ni Paalam sukad midaog kini og silver medal sa Tokyo.
Ang Olympian nga si Nesthy Petecio ug si Hergie Bacyadan mibulsa og bronze medals alang sa kampanya sa Pilipinas sa Jordan. (RSC)