MAASIN CITY, SOUTHERN LEYTE- Miabot na ang adlaw aron tumanon nila ni ALA fighter "Prince" Albert Pagara ug Larvea Gabriel Odoi ang ilang panganti sa usa'g usa sa ilang panagharong karong gabii sa main event sa Pinoy Pride 44 sa Maasin City Gymnasium.
Ang duha ka mga boksidor mag-ilog sa bakanteng WBO Inter-Continental jr. featherweight title nga gilaumang magpasaka sa ilang world ranking.
Sa official weigh-in kagahapon sa gawas sa Metro Gaisano Hyper, ang duha parehong yanong mikuha sa ilang saktong timbang.
Si Pagara (29-1, 20KOs) mihaom sa weight limit nga 122 pounds samtang si Odoi (20-3-2, 14KOs) 120 pounds.
Timaan lang kini nga wala nagpasagad sa ilang training ang duha ka mga boksidor.
Nagkanayon si Pagara nga lahi ang iyang pamati kon moaway siya sa iyang yutang natawhan.
"Karon gani, wa gyud ko gibati og kapoy hilabi na nga nagtan-aw ko sa kadaghan sa mga tawo," matod ni Pagara human sa weigh-in.
"Nalipay ko nga gidala gyud sa ALA Promotions ang Pinoy Pride dinhi sa amoa."
Giangkon ni Pagara nga nahagit siya sa gisulti ni Odoi nga kon adunay ma-knockout ning awaya, dili kini siya.
"Nanganti man siya nga dili gyud kuno siya ma-knockout. Tan-awon lang unya nato ibabaw sa ring," dugang ni Pagara. "Basta kon ako moaway, ako man gyung buhaton nga ma-knockout nako ang kontra kon naay chance,"
Si Odoi nagpanikad na sab sa away.
"I feel good. I prepared well for this fight. I am very ready for tomorrow (karon)," matod ni Odoi.
Sa laing title fight sa promosyon, nga giabagan pagpahigayon sa ALA Promotions ug ABS-CBN, makigsangka si ALA boxer Jeo Santisima (15-2, 13KOs) batok kang Thai Likit Chane (16-5, 10KOs) alang sa inilugay sa WBO Oriental jr. featherweight title.
Gikaintapan sab ang panagharong sa igsuon ni Pagara nga si Jason (40-3-1, 25KOs) batok Indonesian Wellem Reyk (19-17-4, 5KOs).
Sa uban pang mga away, magsangka sila si King Arthur Villanueva batok Renren Tesorio, Melvin Jerusalem batok Philip Luis Cuerdo. (ESL)