Sama sa gipaabot, giharos sa Pilipinas ang individual triathlon gold medals sa 31st Southeast Asian Games sa Sunset Bay, Tuan Chau, Vietnam, Mayo 14, 2022.
Si Kim Mangrobang, subling nakadepensa sa iyang trono sa ikatulong higayon gumikan sa iyang malampuson nga kampanya sa Women’s Division samtang si Fer Cesares maoy nilangkat sa bulawang medalya alang sa men’s title nga maoy nagsilbing 1-2 punch sa Pilipinas.
Subling gipamatud-an ni Mangrobang nga ang Pilipinas maoy hari sa regional meet human iyang gitapos ang lumba sulod sa duha ka oras, 13 minutos ug 31 segundos samtang 2:16:38 ang oras ni Inge Prasetyo nga maoy second.
Si Casares, sa iyang bahin, nitapos sa usa ka oras, 56 minutos ug 57 segundos samtang nagsunod kaniya si Remolino nga nauwahi og 3 minutos.
Ang mga Pilipino nga triathletes nidominar sa maong lumba diin si Ronald Setiawan Bintang nitala og 2:01:35 alang sa third place.
Samtang nalangkat ni Raven Alcoseba sa Pilipinas ang bronze medal sa Women’s category nga adunay 2:18:30.
Sa laing duwa, nalabni ni Agatha Wong sa iyang labing unang pagsalmot sa SEA Games ang silver medal sa taolu taijiquan sa Cau Giay Gymnasium.
Si Wong niiskor og 9.69 sa maong event nga iyang nadag-an og kaduha ka higayon samtang si Alisya Mellynar sa Indonesia maoy nakakuha sa gold medal pinaagi sa 9.71 nga score.
Apan bisan kon nagkuwang og diyutay nga score si Wong aron malabwan ang firat, natagbaw gihapon siya sa iyang performance gumikan usab sa kalisod sa training taliwa sa Covid-19.