Sa ikaduhang higayon, mosuway pagsulod sa quarter-finals ang Gilas Pilipinas pinaagi sa pagpakigbatok sa Qatar ning Lunes, Oktubre 2, 2023, alas 4:00 sa hapon, sa men’s basketball sa 19th Asian Games sa Zhejiang University Zijingang Gymnasium sa Hangzhou, China.
Niadtong Sabado sa gabii, Septiyembre 30, 2023, nisuway ang Gilas pagderetso sa quarter-finals gikan sa Group C apan gipakyas sila sa Jordan, 87-62.
Ang Jordan maoy nakaangkon sa No.1 sa Group C dala ang 3-0 nga rekord nga maoy nagtukmod kanila deretso sa quarter-finals samtang ang Gilas ningdakin-as sa No. 2.
Sa ilang bahin, ang Qatar maoy No. 3 sa Group D nga nagbawon og 1-2 nga rekord gikan sa group phase.
Ang modaog sa engkuwentro tali sa Gilas ug Qatar makasulod sa quater-finals diin ilang ikaharong ang Iran, nga maoy No. 1 team sa Group A.
Sa ilang panagparang, makonsiderar nga inilog og gamay ang Gilas kontra sa Qatar. / ESL