Magsinuntokay karong adlawa ang Pinoy nga boksingero nga si Vincent Astrolabio ug ang Australiano nga si Jason Moloney sa Stockton Arena sa California, USA.
Ang Australian boxer niingon nga swerte na ang iyang kaatbang nga Pinoy nga makalahutay og walo ka rounds sa ilang sangka alang sa bakanteng World Boxing Organization bantamweight crown.
“I think it won’t go past eight rounds,” padayag ni Maloney, 32, taho sa mantalaang Daily Tribune human sa press conference sa Great Wolf Lodge.
Ang trash talker nga Aussie niingon nga andam na siya alang sa iyang ikatulo nga pagsuway paglangkat sa maidlas nga bakos.
Sa iyang unang suway nga paglangkat sa titulo, si Moloney gisanta ni Puerto Rican Emmanuel Rodriguez, human siya gipildi sa puntos niadtong 2018 alang sa International Boxing Federation 118-lb nga korona.
Sa 2020, si Moloney nakigsangka sa Japanese nga si Naoya Inoue, apan siya naigo sa one-punch ug natumba sa ikapitong hugna sa ilang panagsangka alang sa World Boxing Association (WBA) ug IBF strap.
Ning higayuna, nanumpa si Moloney nga sa katapusan molampos siya sa paglangkat og world title tungod sa “great preparation and great sparring.”
Sa iyang bahin ang kalmado nga si Astrolabio, nga mas bata og pito ka tuig, niwitik ngadto kang Moloney nga mag-antos sa iyang ikatulo nga kapakyas ibabaw sa ring.
“I trained long and hard and sacrificed a lot and I am going to win,” padayag ni Astrolabio pinaagi ni Ting Ariosa, kinsa nagsilbi usab nga usa sa iyang mga katabang sa pagbansay. (PAC)