Nadugangan ang kahayag kabahin sa poruhan nga madayon ang rematch tali nila ni American boxing legend Floyd Mayweather Jr. ug Filipino sports icon Manny Pacquiao.
Kini human gi-knockout ni Mayweather sa 2nd round ang tinudloan ni Pacquiao nga si Japanese Mikuru Asakura sa ilang exhibition bout niadtong Dominggo, Septiyembre 25, 2022 sa Saitama Super Arena sa Japan.
Si Mayweather, 45, nakitaan og senyales sa iyang pangidaron dihang naigo siya sa kumo sa Japanese mixed martial artist sa sayong bahin sa away.
Hinuon sa usa lang ka tuong kumo, napatumba ni Mayweather si Asakura sa 2nd round ug giundang na sa referee ang away.
“I’m just happy to be here. I’m happy that we were able to give the fans excitement tonight. Thanks for having me. I’ll be back,” batbat pa ni Mayweather nga napatik sa www.gmanews.tv.
Personal nga nitan-aw sa away si Pacquiao ug iyang asawa nga si Jinkee.
Human niini, ang 8-division world champion nag-post og hulagway sa social media diin kauban si Mayweather sa Japan.
Gituohan nga nakahatag kini og dugang purohan kabahin sa gikahinamang rematch tali nila ni Mayweather ug Pacquiao.
Unang nag-away ang duha ka mga boksidor niadtong 2015 sa Las Vegas diin nidaog si Mayweather pinaagi sa unanimous decision.