Gisumpayan sa Carmen National High School Stallions ug Carmen Central Elementary School ang ilang dominasyon sa 2023 Central Visayas Regional Athletic Association (CVIRAA) ning bag-uhay lang sa Dakbayan sa Carcar.
Matod ni Mark Arsenio Dabedon, coach sa Carmen Central ES, nga sukad pa niadtong 2013, sila na kanunay ang mogawas nga kampyon sa CVIRAA.
Dako og natampo niini ang suporta sa mga ginikanan sa mga bata nga miagak sa ilang mga anak nga mosalmot sa paugnat sa kusog sa ilang tunghaan aron ma-develop ang mga talento niini.
“Grassroots unya suporta sa among team manager nga kanunay nga naa. Ang parents sad sa mga bata nga kanunay gyud nga nakasuporta sa ilang mga anak,” matod ni Dabedon.
Dugang ni Dabedon nga ilang giatiman ang tanang athletes sa tunghaan hangtod nga mograduwar sa elementarya. Ang gikan sa elementarya mao na sab ang moduwa sa high school.
Si Johnrey Camungay, coach Carmen National HS, nagkanayon nga dili na sila maglisod sa pagpangita’g maayong atleta sanglit sila naman ang mopadayon sa nasugdan sa elementarya.
Usa sa nakalahi kanila sa ubang mga tunghaan, aduna silay kompleto nga mga gamit sa baseball nga gidonar sa ilang benefactor nga mao si Engineer Bob Kiamko.
Dili matukod ang baseball team sa Carmen kon wala ang maong mga gamit tungod kay dili sila makapalit niini tungod sa kamahal sa presyo.
Si Ernesto Mangapis, kinsa maoy nagsilbeng tag-iya ug team manager, kanunay nga mokuyog kon dunay mga duwa ang maong mga bata.
Human sa malampuson nilang kampanya sa CVIRAA, ang Carmen ES ug HS squads nangandam na alang sa qualifying event sa Palarong Pambansa karong Hulyo, 2023.
Nagsuporta sa Carmen teams mao ang Bastap Cafe nga gipanag-iya ni Charro Gutierrez Barro, kinsang pamilya mahiligon sa baseball.