ANDAM na ang Cebu City Sharks alang sa kampanya niini sa sunod nga season sa Maharlika Pilipinas Basketball League (MPBL) nga sugdan karong Hunyo 12.
Kagahapon opisyal na’ng gipaila ang nangakuha alang sa bag-ong puwersa sa Sharks pinaagi sa usa ka press conference sa conference room sa International Pharmaceuticals Inc. (IPI), nga maoy nagsuporta sa team.
Ang Sharks mikompleto sa 20 ka mga magduduwa alang sa ilang opisyal nga line-up apan 15 ra niini ang makapakita og aksyon sa matag duwa.
Nahabilin gikan sa line-up sa Sharks sa miaging season mao sila si Jaybie Mantilla, Harold Cortes, Patrick Cabahug, Ralph Dinolan, Jayford Rodriguez, Rhaffy Octobre, William McAloney, Gilbert Lao, Kevin Villafranca, Lee Yu ug Victor Nunez.
Ang mga bag-o sa team mao sila si ex-PBA Eliud Poligrates, EJ Coronel, Cranier Viloria, Johnriel Saycon, Nicole Ubalde, Fret Galvez, John Villaver, ug Christian Pamolaklakin.
“Much better ni compare sa last season. Makaingon ta nga kompleto na gyud ta. Naa ta’y shooters, wingmen ug naa sab ta’y bigmen,” matod ni Sharks coach Norberto “Titing” Manalili sa pagpakighinabi ning mantalaan.
Hinuon gitataw ni Manalili nga dili pa siya makapasalig og dako gumikan kay wala pa masukod ang katakos ning maong puwersa.
Nagkanayon si Manalili nga molarga sila paingon sa Manila karong Hunyo 2 aron mosagubang og duha ka tune-up games sa dili pa sila mosugod og kampanya sa sunod season.
Ang Sharks nakasulod sa playoffs sa miaging season apan gisiruhan kini sa Davao Occidental Tigers, 2-0, sa 1st round pa lang. (ESL)