Determinado ang San Miguel Beermen nga kompletuhon ang wala natiwas nilang misyon sa East Asia Super League (EASL) nga sugdan karong Oktubre 12, 2022.
Nakakuha og kahigayunan ang Beermen sa pagbuhat niini human sila nakasulod sa finals sa 2022 Philippine Basketball Association (PBA ) Philippine Cup diin ilang ikaparang ang TNT Tropang Giga.
Isip finalists sa Philippine Cup, ang Beermen ug Tropang Giga mao ang morepresentar sa Pilipinas alang sa EASL.
Ang Beermen mao ang bugtong team sa PBA nga nakasulod sa EASL Terrific 12 niadtong 2019 apan gitaktak sila sa Liaoning Flying Leopards, nga ninglahos aron langkaton ang korona.
Niadtong higayuna, ang Beermen adunay duha ka reinforcements nga sila si Dez Wells ug Lester Prosper apan wala moduwa ang pambato nilang sentro nga si JuneMar Fajardo.
Ang Tropang Giga hasta ang Blackwater Bossing ningpakita sab og aksyon sa EASL niadtong 2019 apan wa kini nakasulod sa semi-finals.