Kompleto na ang mga parisan sa “Kumong Bol-anon XII” nga gikatakda karong Nobiyembre 4, 2023 sa Bohol Wisdom Gymnasium sa Tagbilaran City, Bohol.
Sa main event, ang one-time world title contender nga si Regie Suganob sa PMI Boxing Bohol makigbatok ni Venezuelan Ronald Chacon alang sa inilugay sa World Boxing Organization (WBO) Global light flyweight title.
Si Suganob mosuway pagbangon gikan sa iyang unanimous nga kapildihan batok ni South African Sivenathi Nontshinga sa ilang International Boxing Federation (IBF) light flyweight title bout niadtong Hulyo 2, 2023 sa South Africa.
Gilaumang malisod nga tahas ang sagubangon ni Suganob batok ni Chacon, kinsa mas taas og kasinatian.
Naggunit si Suganob og 13-1, 4KOs nga rekord si Chacon adunay 30-2-1, 22KOs nga baraha.
Sa supporting bout, magsangka sila si Cebu-based Christian Balunan ug Adatip Muangcharcon sa Thailand aron ilugan ang WBO Youth minimumweight strap.
Sa undercard, magbinukbokay sila si Gerwin Asilo batok Jeffrey Pabila, Shane Gentallan batok Johnro Taneo, Reymart Tagacanao batok Jason Mopon, Casey Morton batok Arisara Weesitwongsa, Althea Shine Pores batok Charimae Salvador, Sugar Ray Leonard Pores batok Jayfe Mabale, Richard Laspoña batok Stephen Lagrama, ug Patryk Roslak batok Ralph Cemino.