Pakyas ang Denver Nuggets sa pagpasawop sa Phoenix Suns atol sa ilang game 3, 114-121, sa best-of-seven series sa Western Conference Semifinals human sila napagtong sa kainit sa Suns.
Ang duha ka superstars sa Suns nga sila si Devin Booker ug Kevin Durant nagkumboya og 86 puntos aron pagtala sa ilang unang daog sa second round sa NBA playoffs, 1-2.
Si Booker niiskor og 47 puntos ug 39 kang Durant aron depensahan ang ilang balwarte batok sa nag-aso-aso nga opensa sa Nuggets, nga kampante nga nanulong sa Phoenix bitbit ang 2-0 nga bintaha.
Si Booker, kinsa nag-average og 35.4 puntos sa playoffs, nipakita sa iyang talagsaong opensa ug nipasulod og 20 sa 25 niya ka field goal attempts, apil na niini ang lima sa walo ka mga itsa gikan sa 3-point area.
Si Durant daw dimalas sanglit 12 lang ang iyang napasulod gikan sa 31 ka attempts , apan iyang napasulod ang 14 gikan sa 16 ka free throws.
Nakuha sa Suns ang 90-88 nga labaw sa fourth quarter, human gipapas sa Nuggets ang 15-point halftime deficit.
Ang Phoenix niiskor sa unang 9 puntos sa ikaupat nga kwarter apil na ang katapusang duha sa fastbreak dunk ni Durant aron iduso ang ilang bintaha ngadto sa 99-88 ug sukad niadto wala na nakadikit og maayo ang Nuggets.
Si Nikola Jokic sa Denver, kinsa nitapos sa ikaduha sa MVP voting niadtong Martes batok kang Joel Embiid sa Philadelphia, adunay 30 puntos, 17 ka assists ug 17 ka rebounds.
Si Jamal Murray maoy nangulo sa Nuggets sa iyang 32 puntos, samtang nidugang og 21 puntos ug 12 ka rebounds si Michael Porter Jr.
Ang Suns mosuway og tabla sa serye sa Game Four karong Lunes gihapon sa Phoenix.
Samtang mag-abot karong alas 8:30 sa buntag ang Los Angeles Lakers ug Golden State Warriors sa Crypto.com Arena sa Los Angeles alang sa game 3 sa ilang best-of-seven series sa West semis.
Ang series nagtabla sa 1-1 human gipilde sa Lakers ang Warriors sa game 1 diin mosuway og depensa ang Lakers sa ilang balwarte. (PAC, AP)