TALIWALA sa mga pagsuway nga iyang naagian, milampos gihapon si Cebu marathon Olympian Mary Joy Tabal pagsakmit og six-peat sa 42nd Milo Marathon National Finals local women’s division kagahapon sa Marcos Stadium sa Laoag City, Ilocos Norte.
Matod sa lumad nga taga brgy. Guba, Cebu City, nga bisan usa na ka tuig ang nakalabay gikan sa pagpanaw sa iyang amahan, lab-as gihapon sa iyang panumdoman ang tanan.
Kahinumdoman nga wala’y 24 oras gikan sa pagpanaw sa iyang amahan sa miaging tuig, midagan gihapon si Tabal ug nakakulit siya’g kasaysayan niadtong higayuna isip five-peat champion.
Ning higayuna, matod ni Tabal nga midulot gihapon sa kinauyokan sa iyang emosyon ang nahitabo sa iyang amahan.
“Ang ako is kini nga race gi-dedicate nako sa akoang father like overcoming about what happened last year kay actually a night before the race kay naghilak pa gani ko, mura’g na feel gihapon nako ang presence sa akoang competition last year hangtod karon,” matod ni Tabal.
“I-compare lang nimo ang mga performances nako this is not my best performance sa Milo kay daghan ko na-encounter nga challenges during the race...to be honest dili ko hundred percent satisfied.”
Si Tabal mihuman og dagan sa 42 ka kilometros nga gilay-on sulod sa duha ka oras, 56 ka mga minutos ug 31 ka mga segundos.
Giangkon ni Tabal nga bisan sa kadaugan, diskuntento siya sa iyang pagpadagan gumikan kay wala niya natuman ang iyang intensyon nga mabuak ang rekord sa lumba nga 2:47:44 nga siya ra sab ang niposte niadtong 2016 sa Iloilo City.
Gipasabot ni Tabal nga dili gusto sa iyang coach nga si Philip Dueñas nga ipagawas niya ang iyang tanang ikabuga aron makasugod dayon sila sa pagbansaybansay sa sunod buwan alang sa mas dakong tahas – ang Olympic qualifying race sa sunod tuig.
Sa men’s local division, naangkon pagbalik ni Rafael Poliquit ang titulo pinaagi sa oras nga 2:28:47. Si Poliquit naghari ning maong lumad niadtong 2014 ug 2015.
Ang duha maoy mo-represent sa nasod sa SEA Games. ESL