Mobalik na si Cebuana Mary Joy Tabal sa naandan niyang gimbuhaton kaniadto – ang pagdagan.
Si Tabal, kinsa maoy labing unang Pinay nga runner nga naka-qualify sa Olympics, nilarga na paingon sa Japan aron mosalmot sa Tokyo Marathon nga gikatakda ugma, Marso 5, 2023.
Mao kini ang labing unang pagdagan ni Tabal og 42-kilometer race gikan niadtong Diseyembre, 2019.
Dugay sab naundang ang regular nga pagdagan ni Tabal tungod sa pagkuyanap sa pandemya. Unya sa niaging tuig, naminyo siya ug nanganak.
Nagkanayon si Tabal nga nadasig siya sa pagbalik og dagan tungod kay gusto niyang representahan ang mga inahan nga mahiligon sa pagdagan sa pagsaulog sa nasod sa National Women’s Month.
“Representing women in sports who are now into motherhood,” matud ni Tabal sa interbyu sa SunStar.