KON natad sa running ang hisgotan, makaingon ta nga di gyud magpalupig ang mga Sugbuanon.
Usa sa nagpamatuod niini mao ang record nga gikuptan sa lumad nga taga Barangay, Guba, dakbayan sa Sugbo nga si Mary Joy Tabal.
Ang 31-anyos nga si Tabal mao ang naghupot sa rekord nga pinakadaghang National Milo Marathon nga titulo sa women’s division. Midaog si Tabal niining national event sulod sa unom ka tuig.
Ang gasunod ni Tabal sa lista mao si Arsenia Sagaray nga adunay lima ka titulo.
Gidominar ni Tabal ang National Milo Marathon sa dekada 2010s samtang si Sagaray maoy nag-hara sa dekada 90.
Gawas sa Milo Marathon, si Tabal nakahatag pud og daghang dungog sa nasod pinaagi sa pagsalmot sa 2016 Rio Olympics. Siya ang labing unang Filipina nga naka-qualify ug mitapos sa 42-kilometer nga dagan sa Olympics.
Midaog pud si Tabal og gold medal sa 2017 Southeast Asian (SEA) Games ug silver medal sa 2019 SEA Games. (RSC)