GIPAKAGING sa San Francisco ang defending champion Consolacion 74-71 aron representahan ang North Divison sa Governor's Cup Inter-Cities / Municipalities Basketball Tournament didto sa Cebu Coliseum.
Ang San Francisco sa isla sa Camotes gipangulohan sa ilang star nga si Kenny Rogers Rocacurva pinaagi sa iyang 25 puntos ug apil na ang iyang free throws sa himatayong segundos nga maoy nagsilyo sa kadaugan.
Gumikan niini, ilang ikaatbang sa Governor's Cup finals ang Talisay City nga dugay rang naghuwat human ilang gisilhig ang lungsod sa Sibonga sa best-of-three sa south division didto sa ilang balwarte.
Si Jake Laurence Gonzales ug Wilson PleƱos Jr., niamot og 14 ug 12 puntos matag usa para sa San Francisco aron langkaton ang kampyonato sa north division 2-1 batok sa inilog nga Consolacion.
Wala magtuo ang mga dumadapig sa defending champion sanglit atol sa game 2 nga didto giduwa sa ilang homecourt, ilang gilubong ang San Franciso 86-61.
Gipangulohan ni Emmanuel Villamor ang Lacion pinaagi sa iyang 18 puntos samtang niamot og 13 ug 11 puntos silang Rey Gonzaga ug Marco Booker Panta.
Ang San Francisco ug Talisay City mag-abot sa game 1 sa best of three finals didto sa Talisay City Sports Complex karong adlaw nga Lunes samtang mag-ilog sa 3rd place ang lungsod sa Sibonga ug Consolacion. (PAC)